විභාගෙ විභාගේඑහෙ බැලුවත් විභාගේ
මෙහෙ බැලුවත් විභාගේ
විභාගේ තමයි අපේ අභාගේ
මේ ජනප්‍රිය නාට්‍ය ගීයක මුල් කොටස යි. අසූව දශකයේ පමණ මේ ගීය අපොස උසස් මට්ටමේ සිසු සිසුවියන් මුවග නිතර රැව් දුන් එකක් විය. ඊට හේතුව මේ ගීය ඇතුළත් ‘විකෘති’ නම් වු වේදිකා නාට්‍යය එකල අසීමිත ප්‍රසාදයක් දිනා ගනිමින් වේදිකා ගත වීම ය. තමන් අසහනයට පත් කරන විභාග පීඩාවෙන් මොහොතකට මිදී ජීවිතයේ සැහැල්ලු බව විඳ ගැනීමේ අවස්ථාවක් ද යෞවන යෞවනියන්ට එම ගී‍ෙතන් උදා කර දුන්නේ ය. විකෘති නාට්‍යය වත්මන දක්වාම විවිධ අවස්ථාවල වේදිකා ගත වෙයි. 80 දශකයෙහි සිසුන් සමඟ පොරකමින් ශාලාවට ඇතුළු වි විකෘති නැරඹූ මම මෑත කාලයෙහි මැදිවියෙහි ජීවත් වන රසිකයකු හැටියට එම නාට්‍ය නරඹා ඉමහත් ආස්වාදයක් ලැබුවෙමි. කතා තේමාව අතින් එය එදාටද වඩා අදට ගැළපෙයි. හෙටටද ගැළපෙනු ඇත. කිසියම් වේදිකා නාට්‍යයක් තේමාත්මක අතින් පිළුණු නොවී දශක කිහිපයක් රසික ප්‍රසාදය දිනාගැනීම ම එහි ඇති විශිෂ්ට බව පිළිබඳ නොවරදින සාක්ෂියකි.
නිදහස් අධ්‍යාපනයේ මහා නිදහස මරාගෙන විකෘති අධ්‍යාපනයක් බිහිවීමත් ලොව කිසිදු රටක නොමැති පරිදි ටියුෂන් අධ්‍යාපනය සිසුන්ගේ ජීවිත බිලි ගැනීමත් අධ්‍යාපනය යුද්ධයක් බවට පත්වීම නිසා යොවුන් විය අසහනකාරී අන්දමින් ගෙවන්නට සිදුවීමත් විකෘති නාට්‍යයෙන් ප්‍රශ්න කිරීමට ලක් වේ. රටේ අධ්‍යාපනඥයන්ගෙන් කී දෙනකු විකෘති නරඹා තිබේ දැයි මම නොදනිමි. එසේ නරඹා තිබුණා නම්, නිදහස් අධ්‍යාපනය කුණුවීමේ වේගය මේ තරමින් වැඩි දියුණු වන්නට ද ඉඩක් නැත.
විකෘති නාට්‍යයේ නිර්මාතෘවරිය වූ සෝමලතා සුබසිංහ දැයෙන් සමුගෙන ගතවී ඇත්තේ දින කිහිපයකි. අනූව දශකයේ දිනෙක සාහිත්‍ය මිතුරන් රැසක් ද සමඟ කුලියාපිටිය ප්‍රදේශයෙහි ඔවුන් පදිංචි නිවසට ගිය මම, විකෘති නාට්‍ය පිළිබඳ බොහෝ දේවල් කතා කළෙමි. ම‍ෙග් මතකයේ හැටියට ඇගේ සැමියා වන ලයනල් ප්‍රනාන්දුගේ ගම කුලියාපිටිය විය යුතුය.
සෝමලතා සුබසිංහ 1950 දශකයෙහි මෙරට සාහිත්‍ය හා ශාස්ත්‍රීය ප්‍රබෝධයෙහි පුනරුදයක් පැවති සමයේ පේරාදෙණිය සරසවියෙන් උසස් අධ්‍යානය ලැබීමේ මහඟු වරම හිමිකර ගත්තා ය. සෝමලතා මෙන්ම පසු ව ඇගේ සැමියා බවට පත්වූ නිහාල් ප්‍රනාන්දු ඇතුළු ඉහළම ගණයේ රසිකත්වයක් හිමි වූ ශාස්ත්‍රවන්තයෝ විශාල පිරිසක් එවක පේරාදෙණිය සරසවියෙහි අධ්‍යාපන ලැබූහ. මහාචාර්ය සරච්චන්ද්‍රයන් ගේ වේදිකා නාට්‍ය, චිත්‍රසේනයන්ගේ මුද්‍රා නාට්‍ය යනාදිය ඔවුන්ගේ කුසලතා වර්ධනය කරගැනීම කෙරෙහි බලපෑවේය.
සෝමලතා සුබසිංහ අති දක්ෂ රංගන ශිල්පිනියකි. වේදිකා නාට්‍ය හා චිත්‍රපටි රැසක් ඔස්සේ ඇය තම ප්‍රතිභාව විශද කොට ඇත. එමෙන් ම රටවල් ගණනාවක ළමා නාට්‍ය කලාව පිළිබඳ කළ අධ්‍යයන ඔස්සේ ඇය පිහිටු වූ ළමා හා යොවුන් රංග පීඨය දරුවන්ගේ කලා කුසලතා වර්ධනය කර ගැනීමේ තෝතැන්නක් බවට පත්විය. ඇය විසින් නිර්මාණය කරන ලද ළමා නාට්‍ය ගණනාවක්, ඉංග්‍රීසි බසින් විදෙස් රටවල ද ප්‍රදර්ශනය කර ඇත. ප්‍රාදේශීය හා ජාත්‍යන්තර වශයෙන් ඇය ඇගයුමට පත් වූ අවස්ථා ද රැසකි. කාන්තාවන් සහ දරුවන් උදෙසා නාට්‍ය අධ්‍යයනය සම්බන්ධයෙන් ජනමාධ්‍ය ඔස්සේ ඇය විසල් මෙහෙවරක් සිදු කර ඇත.
සෝමලතා සුබසිංහ, නාට්‍ය නිර්මාණය නාට්‍ය අධ්‍යාපනය, රංගනය යනාදී ක්ෂේත්‍ර ගණනාවක එක විට යෙදුණු විශිෂ්ටතම ශ්‍රී ලාංකීය කලාකාරිණිය හැටියට සම්භාවනාවට පත් වෙයි.
එහෙයින් ඇගේ වියෝවෙන් අපේ රටට සිදු වූ අඩුව අන් කිසිවකු හට පිරවිය නොහැක්කක් වන බව සටහන් කරනුයේ ශෝකයෙනි.
තිඹිරියාගම බණ්ඩාර
http://www.dinamina.lk/
0 comments:
Post a Comment
ඔබගේ අදහස් අපට මහ මෙරකි