Monday, December 21, 2015

මගේ චරිතය හැදුණේත් මගේ ගායනය වැඩුණේත් පල්ලිය නිසයි

- අයිවෝ ඩෙනිස්

ජේසු උපන්දා, අති ලෝක වාසි, සිත් තුළ සාමය පුබුදා, තාරකා කියන, දේවදූත... ආදී නත්තල් ගී ඇසෙන විට ඒ අයිවෝ ඩෙනිස් යැයි මතකයට නැ‍ඟෙන්නේ නිතැතිනි. සුනිල් සාන්තයන්ගේ ගී මඟ යමින් සුනිල් සාන්ත ආරට ගී ගයන අයිවෝ මුල්කාලයේ සංගීත ගුරුවරයකු ලෙස ද පසුව සංගීත උපදේශකවරයකු ලෙස ද කටයුතු කළේ ය.
සුනිල් සාන්ත සමග
“වරෙන් හීන් සැරේ... ගීතය ගුවන් විදුලියෙන් මීට දශක ගණනාවකට කලින් ප්‍රචාරය වෙද්දී ගීතයේ හිමිකරුවා වූ සුනිල් සාන්ත ද ඊට කන්දී සිටියේය. එසේ දැඩි අවධානයෙන් කන්දී සිටියේ ඒ ගීතය ගයන්නේ තමන්දැයි සැකහැර දැන ගැනීමට ය. නැත. ගීතය ගායනයේදී සුළු අඩුවක් ඔහුගේ අවධානයට ලක් විය. සුනිල් සාන්තයන් ගීය ගැයූ පුද්ගලයා පිළිබඳව විමසිලිමත් වූයේ ය. අවසානයේ පැට්‍රික් දෙනිපිටියගේ උපකාරයෙන් වරෙන් හීන්සැරේ ගීය ගැයූ ගායකයාට තමන් හමුවට ගෙන්වා ගත්තේ ය.
පණිවුඩය ලද තරුණයා සුනිල් සාන්තයන් හමුවීමට ගීයේ ය. එක් දහස් නවසිය පනස් දෙකේදී ය.
“ඔය කියන කාලෙදි මට අවුරුදු දහ නවයක් විතර ඇති. මම ශ්‍රී ලංකා ගුවන්විදුලියේ වෙළෙඳ සේවයෙන් විකාශය වූ ආධුනික පැය ගීතමය වැඩසටහනටයි සුනිල් සාන්තයන්ගේ ‘වරෙන් හීංසැරේ’ ගීය ගායනා කළේ. එය අසාගෙන ඉඳලා ඔහු මට එන්නැයි පණිවුඩය එවා තිබුණා. මා ගොස් ඔහු හමුවුණා. “සංගීතය ඉගෙන ගන්න කැමැති දැයි ඔහු ඇසුවා. අපේ තාත්තා එතරම්ම කැමැති වුණේ නැහැ. නමුත් අම්මා එක පයින් කැමැති වුණා. සුනිල් සාන්ත මහත්මයා තේරුම්කර දුන්නට පස්සේ තාත්තාත් කැමති වුණා. සුනිල් සාන්තගේ සංගීත පන්තිය තිබුණේ මරදානේ නියුටන් බිල්ඩිමේ තැනෙක. මම වසර දෙකක් එහි සංගීතය ඉගෙන ගත්තා. ඔහුගේ පංච මධුර, රන්වලාව සංගීත වැඩසටහන්වල ගී ගැයීමටත් මට අවස්ථාව ලැබුණා.
අයිවෝ ඩෙනිස් විවාහ වූ දා
එදා යෞවනයෙකු ලෙස ගීත ක්ෂේත්‍රයට එක්වූ අයිවෝ ඩෙනිස් අද ජීවිතයේ සැදෑ සමය ගෙවන්නේය. නමුදු ඔහු තුළ එදා තිබූ හඬ පෞරුෂය තවමත් ‍එලෙසම පැවතීම ආශ්චර්යයකි.
එක්දහස් නවසිය තිස් දෙකේ වසරේ මැයි විසි අටවන දින උපන් අයිවෝ ඩෙනිස් පස් දෙනෙකුගෙන් යුතු පවුලේ හතරවැන්නා ය. ඔහු සීදූව දවිසමර ප්‍රාථමික පාසලෙන් ද මීගමුව මාරිස්ටෙලා විද්‍යාලයෙන් හා මීගමුව ලොයෙලා විද්‍යාලයෙන් ඉගෙනුම ලැබුවේ ය. දශක ගණනාවක් පුරා ගායන ක්ෂේත්‍රයේ රැඳී සිටින අයිවෝ ඩෙනිස්ගේ හඬ පෞරුෂය සුවිශේෂී ය. ඔහු ගයන්නේ අමුතුම ලතාවකට ය. විශේෂයෙන් ම ඔහු ගේ ගී හඬ වඩාත් වටින්නේ නත්තල් සමයට ය. ඔහුගේ ගී හඬ වඩ වඩාත් ඔප මට්ටම් වූයේ කතෝලික පල්ලියෙනි.
“මං උපන්නේ සීදූව ගමේ. අපි කතෝලිකයෝ. ඒ කාලේ මේ අද වගේ සීදූව නගරය ජනාකීර්ණ නැහැ. අපේ ගෙයත් ඇතුළුව තවත් ගෙවල් හතරක් පහක් තමයි මේ අවට තිබුණේ. ඒ ගෙවල් තිබුණෙත් ඈතින් ඈතින්... හැන්දෑවට අපි ඔක්කෝමලා එකතුවෙලා ගීත ගායනා කරනවා. ඒ ගී හඬ ඈතින් ඈතට ඇහෙනවා‍. මගෙ තාත්තා පල්ලියේ ගායන කණ්ඩායම මෙහෙයවූවා. ඒ නිසා පල්ලියත් අපේ පවුලත් අතර තිබුණේ සමීප සම්බන්ධතාවක්. මට යහපත් මනුස්සයෙක් වෙන්න පල්ලියේ ආභාසය බෙහෙවින් ම බලපෑවා. ඒ වගේ ම තමයි මගේ හඬ පෞරුෂය හැදුණේ පල්ලියේ ගීත ගායනා නිසා. පාසල් යන කාලේ ඉඳලම මම පල්ලියේ ගී කණ්ඩායමේ හිටියා.”
අයිවෝ ඩෙනිස් පවසන්නේ අතීත මතකයන් අවුස්සමිනි.
“දැන් නම් නත්තල වානිජකරණය වෙලා. නමුත් අපි පුංචි කාලේ එහෙම දෙයක් තිබුණේ නැහැ. අද නත්තල කිව්වම වැඩිපුරම අවධානය යොමු කරන්නේ කෑමට, බීමට, ඇඳුම්වලට. ඒ කාලේ නත්තල කිව්වම මුල්තැන දුන්නේ ආගමික වැඩවලට. පල්ලියේ දේව මෙහෙයට, නත්තල් කැරෝල් ගීතවලට. කුඩා අපි ඒ කාලේ මේ දේවල් නිසා පුදුමාකාර මිහිරක් වින්දා.”
ඔහු ගැයූ නත්තල් ගීත බොහෝ ය. නත්තල් ගුවන්විදුලි වැඩසටහන්වලට එකල ඔහුගේ හඬ නැතිවම බැරි විය. ඒ තරමට ම නත්තල හා අයිවෝ ඩෙනිස් හඬ එකට බැඳී තිබුණි.
මිනිබිරිය දෙව්මිණි
මම මුලින් ම ගයපු ගීතය තමයි ‘කුරුලු පාරාදීසයේ - කුරුලු සිහින සාගරේ’ ගීතය. මේ ගීතය මම ගැසුවේ සුනිල් සාන්ත මහතාගේ සංගීත පන්තියේ ඉගෙන ගන්නා කාලේ එම පන්තියේ ම හිටපු තිලක සුදර්මන් ද සිල්වා තමයි ගීතය ලිව්වේ. ‍පසුකාලීනව මට චිත්‍රපට කිහිපයකම ගී ගැයීමට අවස්ථාව ලැබුණා. මංගලතෑග්ග, කවුද හරි, පාර දිගේ, ආදී චිත්‍රපටවල ගී ගයා තිබෙනවා. ඒ වගේ ම මට සුනිල් සාන්තයන් සමඟ වගේ ම ඩබ්ලිව්.බී. මකුලොලුව, ප්‍රේමසිරි කේමදාස, වැනි සංගීතඥයන් සමඟත් වැඩ කිරීමේ අවස්ථාව ලැබුණා. බොහෝ අය කියනවා මගේ ගී හඬ සුනිල් සාන්ත‍යන්ගේ හඬට සමානයි කියලා. නමුත් එතුමා කවදාවත් ඊට විරුද්ධ වුණේ නැහැ. ඔහු එය අගය කළා. හඬ වැඩි දියුණු කර ගැනීමට අපට හැමවිට ම උදව් කළා.
දැන් ඔහු අසූ තුන් හැවිරිදි ය. වසර හැට තුනක් තිස්සේ ම ඔහු ගයන්නේ ය. විටෙක මේ ගායකයන් ඇගයීමට ලක්වූවා මදි දැයි කෙනෙකුට සිතෙන්නට පුළුවන. එවැනි ප්‍රශ්නයක් විමසූ විට ද අයිවෝ ඩෙනිස් උත්තර දෙන්නේ බොහෝ ඉවසීමෙනි.
මට OCIC සම්මාන‍යත්, හොඳම චිත්‍රපට ගායකයාට හිමි සම්මානය ඇතුළු තවත් බොහෝ සම්මාන ලැබී තිබෙනවා. ඒ වගේ ම ඒ කාලේ බොහෝ ගුවන් විදුලි වැඩසටහන්වලට සහභාගි වී තිබෙනවා. නමුත් මම වසර හයකින් පමණ ගුවන් විදුලිය සමඟ සම්බන්ධ වී නැහැ. හේතුව දුර බැහැර යාම දැන් අපහසු නිසා. මෙවර නත්තලටත් රූපවාහිනි වැඩසටහනකට ආරාධනා ලැබී තිබෙනවා. එක වෙලාවකට හිතෙනවා අපිව එහෙම පිටින් ම අමතක කර දමලත් නැහැ කියලා.”
දියණිය, පුතු හා මිනිබිරිය ගේ ආදරය ලබමින් ඔහු දැන් වැඩිපුරම කාලය ගත කරන්නේ නිවෙසට වීය. දරුවන් ඔහුගේ අඩිපාරේ නොගියත් දියණියගේ දියණිය දෙව්මිණි ගායන ‍ක්ෂේත්‍රයේ ඉදිරියට යන අයුරු ඔහු බලා හිඳින්නේ හද පිරි සතුටකිනි.
මගේ අම්මා තමයි මගේ සංගීත ජීවිතයට බොහෝ උදව් කළේ. තාත්තා මා සංගීත ක්ෂේත්‍රයට යනවට බය වුණේ දුරාචාරයට යොමුවේවි කියලා. නමුත් පල්ලිය ඇසුරේ මගේ චරිතය යහපත්ව ගොඩනැඟුණා සේ ම, මගේ කටහඬ හැදුණේ පල්ලියේ ගීතිකා ගැයීමෙන් ගායනා කණ්ඩායමේ සිටීමෙන් බව පවසන්නේ බොහෝ ම ගෞරවයෙන්.

http://www.silumina.lk/2015/12/20/_art.asp?fn=af15122017

0 comments:

Post a Comment

ඔබගේ අදහස් අපට මහ මෙරකි