Thursday, May 28, 2015

මාර්ටින් වික්‍රමසිංහ - සිංහල ජනවිඥානයේ සනාතන මූර්තිය

කුශාග්‍ර බුද්ධිමතුන් වශයෙන් අප විසින් හැඳින්වෙන විශිෂ්ටයන් හැම දෙනා ම සතු විශේෂ චරිත ලක්ෂණයක් වෙයි. තමන් අන් අයට වඩා වෙනස් යැයි යන හැඟීම, ඒ මහා ප්‍රාඥයන් සියලු දෙනාටම පොදු චරිත ගතියකි.
මිගෙල් ඩි උනමූනෝ (1864 - 1936)
ස්පාඤ්ඤ ජාතික දර්ශනවාදියා
සිංහලයේ පෘථුල බුද්ධි ‍ක්ෂේත්‍රයේ, අග්‍රගණ්‍ය ජන ප්‍රාඥයකු වීමේ භාග්‍යය උරුමකොටගෙන, මාර්ටින් වික්‍රමසිංහ සිඟිත්තා මෙලොව එළිය දුටුවේ, මෙයට අවුරුදු 125 කට පෙරයි‍. එහෙත් එවැනි දිගු කලකටත් පසුව, මාර්ටින් වික්‍රමසිංහ, යුගයෙන් යුගය, යළි යළිත් උපදින්නේ ය.
එයට, හේතුව, අලුතින් සිංහල සංස්කෘතියට එළැඹෙන දරු - දැරියන් ගේ චින්තනයෙහි මාර්ටින් වික්‍රමසිංහ නැවත උපත ලබන හෙයිනි.
ඔහු ජීවත්ව සිටියේ අසූහය වසක් පමණි. එහෙත්, ඒ කාල පරිච්ඡේදය තුළදී ඔහු විසින් ජන දායාද වශයෙන් මෙලොවට තිළිණ කළ බුද්ධිමය නිධාන සම්භාරය, තාමත්, ස්පන්දනය වෙමින් දිදුලු දෙන්නේ ය.
ශ්‍රී ලංකාවේ දිගු සාහිත්‍ය සම්ප්‍රදායෙහි වරණ්ඩයන් ඔස්සේ, මාර්ටින් වික්‍රමසිංහයන්ගේ උදාර ජයග්‍රහණ, අඛණ්ඩ ව ම රැව් - පිළිරැව් දෙමින් විහිදෙති. කාල‍යාගේ ඇවෑමෙන් ලොව පුරා නව සන්නිවේදන මංකඩ අනිවාර්යයෙන් ම පහළ වෙති. එහෙත්, මේ මහා ජන ප්‍රාඥයා විසින් නඟන ලද, නිර්මාණශීලී හ‍ඬෙහි දෝංකාරය, ඒ දියුණු, නවීනතම මාධ්‍ය වන, සිනමාව, රූපවාහිනිය හා ගුවන් විදුලිය වැනි සන්නිවේදන පථ ඔස්සේ, අදත් නො අඩුව රාව - ප්‍රතිරාව නංවයි. ඉන් ඉතා පැහැදිලි ව ම ප්‍රකාශ වන්නේ මේ මහා ප්‍රාඥයාගේ මූලික දර්ශනය සතු, කාලයට අභියෝග කළ හැකි ජීව ශක්තිය යි. සනාතන නාමයක් සහිත, ජන ප්‍රාඥයකු වීමේ උච්ච කූටය කරා යන්නට, ඔහුට ආභාසය සලසන ලද්දේ ඔහු විසින් ජන්මයෙන් ලබන ලද අපූරු ගැමි ළමා සමය විසිනි.
බොහෝ දෙනා මාර්ටින් වික්‍රමසිංහ දන්නේ වයෝවෘද්ධ, ඥාන වෘද්ධ මුහුකුරාගිය වැඩිහිටියකු වශයෙනි. ඒ නිසා සිය ගැමි ළමා සමය සතු විශේෂ ගුණය නිසා ඔහු බුද්ධි ලෝකය ජයගත්තේ යැයි කියන නිගමනය, බොහෝ දෙනාට නුහුරු විය හැකි ය.
කාටත් ළමා සමයක් ඇත්තේ ය. ශ්‍රී ලංකාවේ බොහෝ දෙනකුට ගම්මානයක ගත වුණු ළමා වියක් අයත් ය. එසේ නම් වික්‍රමසිංහගේ ළමා සමය සතු සුවිශේෂී ලක්ෂණය කවරේද? බොහෝ දෙනාට එසේ සිතෙනු ඇත.
මෙය, තරමක් තියුණු ලෙස විමසා බැලිය යුත්තකි. ඔහු උපත ලද කොග්ගල - මලලගම ගම්මානය, එදා සොබාදහම විසින් අරක් ගන්නා ලද කමනීය බිම් පෙදෙසක් වූයේ ය. කෘත්‍රිම නාගරික ලක්ෂණ ඒ ගැමි සිරියාවට අතපෙව්වේ නොවේ. ගැහැණු දරුවන් අට දෙනෙකුගෙන් යුත් පවුලක එක ම පිරිමි දරුවා වූ නිසා, ඔහුට ලැබෙන ආදරය, අසාමාන්‍ය මානව වර ප්‍රසාදයක් වූයේ ය.
රිසි පරිදි යන්ට - එන්ට සහ හැසිරෙන්නටත් කුඩා මාර්ටින් දරුවාට ඉඩකඩ සැපයුණේ ය.
පසුව මුහුකුර‍ා ගොස් දැවැන්ත වෘක්ෂයක් බවට පත්වූ ඔහුගේ ජන බුද්ධියේ, කුඩා බීජයට අවශ්‍ය පෝෂණය සැපයුණේ ඔහුගේ තියුණු කුතුහලය නිසා ය. ළමා කාලයේදී, හැම දරු‍වකු තුළ ම කුතුහලයක් ඇත්තේ ය. පරිසර‍ය ජයගෙන ජීවිතය ගෙන යනු පිණිස, සොබා දහම විසින් දරුවන්ට පිදෙන ශක්තිය එයයි. එහෙත්, ළමා සමය සතු සාමාන්‍ය කුතුහලයට වඩා තියුණු, අධිකුතුහලයන් ඇතැම් දරුවන්ට ලැබෙන්නේ ය. මාර්ටින් දරුවා ද ඒ වරප්‍රසාදය ලද්දෙක් විය. ගමේ සම වයසක අන් දරුවන්, පරිසරය පිළිබඳ ව අවදි නොවී නින්දෙන් ඇවිදින්නාක් සේ, පුරුදු ජීවන රටාව කරගෙන යද්දී, කුඩා මාර්ටින් දරුවා ප්‍රශ්න අසන්නටත්, සිය කුතුහලයට ඉඩ දී යම් යම් දේ තියුණු ලෙස විමසන්නටත් පුරුදු වූයේ ය. ඔහුගේ කුතුහලයට සරිලන මහා ලෝකයක් ඔහු අවට විහිදියේ ය. අනන්තයට විහිදෙන ගොළු මුහුද - ඉන්දියානු සාගරය එක් පසෙකින් පැවැත්තේ ය. දිය පාරවල්, සතා - සිව් පාවා වනගහණ ආදී ස්වාභාවික නිධාන, ගම්මානය පුරා ඔහු වෙනුවෙන් සැදී තිබිණි. ඔහුගේ ළමා ආත්මය විස්මයෙන් පිරුණේ ය.
ඔහුගේ ආධ්‍යාත්මය තවත් නිර්මාණශීලී ලෙස අවුස්සන සිද්ධියකට ඔහු දහසයවන වියේදී ම මූණපෑවේ ය. සිය සුමිතුරු පරිසරයෙන් වියෝ වී ඔහුට නගරයට සංක්‍රමණය වන්නට සිදු විය. ඔහු සිදාදිගත වූයේ, ජීව වේගය උතුරා යන ළමා සමය, ගම්මානයේ තබා ලා ය.
දකුණු ගම්මානයට ඔහු සතුව තිබුණු දැඩි ආශක්ත භාවය, ඔහුගේ ජනබුද්ධිය අවදි කළ ප්‍රබල ආවේගය විය. සිදාදියේ කොන්ක්‍රීට් පවුරු මැද දී, ඔහුට ළමා ලෝකයේ අසීමිත විස්මය සිහි වූයේ දැඩි අතීතකාමයකින් ඔහුගේ ආධ්‍යාත්මය පෙළමින් ය.
ඔහු ගමේ ගෙවුණු ළමා වියට නිර්මාණශීලී අගයක් එකතු කළේ ය. එදා ගම් සිරියෙන් ලද ආස්වාදය, ඔහු මුළු මහත් දේශයේ ම අතීතය කෙරේ යොමු කොට, මහා පරිමාණයේ සාංස්කෘතික ගවේෂණයක යෙදුණේ ය. අපගේ දේශජ නිර්මාණශීලී සාහිත්‍යය සතු අසහාය චමත්කාරය අනාවරණය කොට ගෙන, සිය අත්දැකීම් ශ්‍රී ලංකාවේ පාඨක ලෝකයට උරුම කරන්නට දැරූ ප්‍රයත්නය, නව සාහිත්‍යයික නවෝදයකට මුල පිරුවේ ය.
මෙසේ විශ්ලේෂණාත්මක ව සලකා බැලීමේදී එළැඹිය හැකි නිගමනයක් වෙයි.
මෙසේ මාර්ටින් වික්‍රමසිංහ නම් සිංහල ජන ප්‍රාඥයා, ජන බුද්ධිමය ජයග්‍රහණ ලබා ගත්තේත්, දේශජ ආත්මයේ සනාතන මූර්තිය බවට පත්වූයේත්, ඔහුගේ ආධ්‍යාත්මික අතීතකාමී නිර්මාණ කෞශල්‍යය නිසා ය.
තමන් සතු නොතිත් ඥාන කුතුහලය, ඔහු ජන සතු කළේ ය. සත්ව සන්තතිය පිළිබඳ ව මුල් පොත් කළේත් ඔහු ය. තමාගේ ආස්වාදය දිනූ අදහස් - උදහස්, ඔහු පාඨක ලෝකයට බෙදා දුන්නේ ය. දැනුම් පිපාසය සඳහා කෙමෙන් අවදි වීගෙන මහා දේශජ රසිකයන්ගේ සිත දුටු ඔහු සිය ලිපි - ලේඛන හා නිර්මාණශීලී කෘති මඟින් ජන අවශ්‍යතා සපුරාලූයේ ය. සනාතන මූර්තියේ ජන්මතලය, ෙකාග්ගල ගම්මානයයි.

0 comments:

Post a Comment

ඔබගේ අදහස් අපට මහ මෙරකි