අන්තිම වටයට සින්දු තේරුවේ මගේ තාත්තා
තුෂානි පෙරේරා
යක්කල අනුර මධ්‍ය මහා විද්‍යාලයේදි තුෂානි පෙරේරා සංගීතය කළ යුතුයි කියා මුලින්ම කීවේ ශාන්ති රමණි ඩයස් ගුරුතුමියයි. ඉන් පසු සුනිල් කරුණාරත්න ගුරුතුමාගේ සෙව‍ෙණ් උසස් පෙළටත් ‘ඒ’ සාමාර්ථයක් සංගීතය වෙනුවෙන් ලබා ගන්න තුෂානිට හැකි වුණා. සංගීත රසිකයන් වූ මවත් පියාත් ඇයගේ ගමනට බාධා නොකළ නිසා අද වන විට ලොවම දන්නා සුපිරි තරුවක් බවට තුෂානි පෙරේරා පත් වුණේ ‘රණවිරු රියල් ස්ටාර්’ තෙවැනි අදියර ජය ගනිමින්. ඇයට මේ මොහොතේ කියන්නට දේ බොහොමයි. ඉන් බිඳක් අප මෙසේ සටහන් කරන්නේ ඇය හා යෙදුණු පිළිසඳරකින් පසුවයි.
රණවිරු රියල් ස්ටාර් ජයග්‍රාහිකාව විම පිළිබඳ ඔබට දැනෙන හැඟීම?
තරගකරුවන් 7500 ක් අතරින් ජයග්‍රහණය කිරීම ගැන මට ලොකු සතුටක් තිබෙනවා.
ඔබ මෙසේ ජය ගනී කියා මුල සිටම සිතුවාද?
මම බොහෝ වාරයක් රැඳුණේ් 6 වැනි ස්ථානයේ. සති අටෙන් තුනකදී පමණයි දෙවැනියා හා තුන්වැනියා බවට පත් වුණේ. අනෙක මගේ උගුරේ ආබාධයක් ඇති වුණා. ඒ නිසා මට බයකුත් තිබුණා. අවසන් පස්දෙනා අතරට එන්න බැරිවෙයි කියලා. මාලනී බුලත්සිංහල මහත්මියගේ ‘ප්‍රේමයේ විල්තෙරේ’ ගීතය ගායනා කරලා අවසාන පූර්ව වටයෙදී තුන්වැනියා වුණා. ඊට පස්සේ තමයි යම් විශ්වාසයක් දැනුණේ.
මේ වාරයේදී මුල් වාර දෙකටම වඩා වෙනස් ආකාරයකින් තමයි තරගකරුවන් තෝරා ගත්තේ. එය ඔබට බලපෑවේ කෙසේ ද?
ඇත්තෙන්ම එය ගෝඨාභය රාජපක්ෂ ආරක්ෂක ලේකම් තුමාගේ විශිෂ්ට සංකල්පයක්. මොකද තුන්වැනි වටයේ තිබුණු ඒ වෙනස නිසා අපට බොහෝ සාධාරණයක් ඉටු වුණා. අප හැමෝම මිනිසුන් හැටියට මානසික හා ශාරීරික වශයෙන් යම් යම් ගැටලුවලට මුහුණ දෙනවා. හැම සතියෙම එක වගේ තරග කරන්න බැරිව යනවා. කටහඬ කියන්නේ අපේ මානසික ශාරීරික වෙනස්කම් සමඟ වෙනස්වන දෙයක්නේ. ඉතින් එක සතියක මට වුණා වගේ උගුරේ ආබාධයක් ආවත් ඊළඟ සතියේදී අපට හොඳ තරගයක් දෙන්න අවස්ථාව තිබුණ නිසා අපේ සැබෑ දක්ෂකම් එළිදක්වන්න හැකි වුණා.
ඔබට ලැබුණු පුහුණුව ඒ මානසික ශාරීරික අපහසුතා මඟ හරවන්න පිහිට වුණා ද?
ඉතාමත් වැදගත් වුණා. විශේෂයෙන්ම අනෝජා වීරසිංහ මහත්මිය අපට ඉගැන්වූ භාවනා ක්‍රම ආදිය නිසා මොන ප්‍රශ්නය තිබුණත් සිත ඒකාග්‍ර කරගෙන තරගයට මුහුණ දෙන්න අපට ඒ පුහුණුව මඟ පෑදුවා. ඒ වගේම සමන්ත පෙරේරා මහතා සහ ඉන්දිකා උපමාලි මහත්මියගේ උපදෙස් තරගකරුවන් සියලු දෙනාට ඉතා වැදගත් වුණා.
විනිශ්චය මණ්ඩලය ඔබට දුන් විනිශ්චය පිළිබඳ ඔබ සිතන්නේ කුමක් ද?
මට නම් විනිශ්චය මණ්ඩලය උපරිම සාධාරණය ඉටු කළ බව කිව යුතුයි. හැම වාරයකදීම වගේ ඔවුන්ගේ ලකුණු 60 න් සියයට 95 ක් පමණ මට ලැබුණා. ඒ අය දෙන උපදෙස් හා විවේචන වැඩසටහන අවසානයේ ආපසු බැලූ විට ඊළඟ වටයට ඉදිරිපත් විය යුතු ආකාරය ගැන වැඩි වැටහීමක් ලැබුණා. ඒ වගේම අවසන් වටයේදීත් ඔවුන් ඉතා සාධාරණ විනිශ්චයක් මට ලබා දුන්නා.
ඔබ ගැයූ ගීත තෝරා ගත්තේ කාගේ හෝ උපදෙස් මතද?
මගේ තාත්තා තමයි මට කීවේ අන්තිම වටයේදී සුජාතා අත්තනායක මහත්මියගේ ‘සත්‍යයි ඔබේ දර්ශනේ’ ගීතය හා ලතා වල්පොල මහත්මියගේ ‘රොන් සොයා’ ගීතය ගයන්න අනිවාර්යයෙන් හොඳ ප්‍රතිචාර ලැබෙයි කියලා.
ඔබට ලැබුණු එස්.එම්.එස්. ප්‍රමාණය ගැන මොකද හිතෙන්නේ?
පළමු වටයකදි ලැබුණු වැඩිම එස්.එම්.එස්. ප්‍රමාණය කියලායි ඒ සංඛ්‍යාව වාර්තා වෙන්නේ. ලක්ෂ හතළිහකට වැඩියෙන් කෙටි පණිවුඩ ලැබිලා තිබෙනවා. මට හිතෙනවා මම ගීත හොඳින් ඉදිරිපත් කරන්න ඇති කියා. ඒ වගේම මේ රටේ හොඳ කලා රසිකයන් ඉන්න බවටත් ඒක හොඳ සාක්ෂියක්.
ඔබට ලැබුණු නිවෙසේ පදිංචි වන්නේ කවදාද?
අපි දැනට පදිංචි යක්කල ප්‍රදේශයේ. ඉතින් ආසයි මේ ගෙදර පදිංචියට එන්න. 2 වැනිදා තමයි නිල වශයෙන් නිවෙස මට ලැබුණේ. අම්මයි තාත්තයි මල්ලියි වගේම මගේ අත ගන්න ඉන්න කෙනාගේ කැමැත්ත අනුව අපි පදිංචියට එනවා.
ඔබේ අනාගත සැමියාගෙන් මේ තරගයට උදව් ලැබුණා ද?
හුඟක් ලැබුණා. ඔහු තමයි මට ගීත අන්තර්ජාලයෙන් සොයා දුන්නේ. මට පුහුණුවීම් ආදිය නිසා රෑ බෝවද්දි ගෙදර එක්කගෙන ගියේ. සැම මොහොතෙම මගේ තනියට ඉඳිමින් මට ධෛර්යයක් වුණේ ගුවන් හමුදාවෙම වාහන අංශයේ සේවය කරන ඔහු කෝප්‍රල් රංජන්.
මේ ජයග්‍රහණය සමඟ ඔබට ද්විත්ව උසස්වීමක් ලැබුණා.
ඔව්. ඒ ගැනත් මට හරිම සතුටුයි. සාමාන්‍යයෙන් ගුවන් හමුදාවේ එවැනි උසස්වීමක් ලබන්න වසර 12 ක් 14 ක් පමණ සිටිය යුතුයි. නමුත් මම තවම මේ සේවයේ වසර අටයි. ඉතින් එය ලොකු භාග්‍යයක් කියා සිතනවා. ලීඩ්න් එයාර් ක්‍රාෆ්ට් වුමන් සිට කෝප්‍රල් තනතුරු පසු කර සාර්ජන්ට් මට්ටමට තමයි මට උසස්වීම ලැබුණේ.
ඔබේ අනාගත බලාපොරොත්තු, කලා දිවිය ගැන අපේක්‍ෂා මොනවාද?
ගුවන් හමුදාවේ දිගටම සේවය කරන අතරම ගුවන් හමුදාපතිතුමාගේ අවසරය මත හොඳ නිර්මාණ මගින් රසිකයන් වෙත යන්නත්, හමුදාවට සේවයක් කරන්න මේ හැකියාව උපයෝගී කර ගන්නත් බලාපොරොත්තු වෙනවා. ඒ වගේම ආබාධිත රණවිරුවන් වෙනුවෙන් මගේ ක්ෂේත්‍රයෙන් යම් සේවයක් කළ හැකි නම් එය තමයි මගේ ලොකුම අපේක්ෂාව.
0 comments:
Post a Comment
ඔබගේ අදහස් අපට මහ මෙරකි